 |
| foto pribadi |
“Kang Sudin jempolan nemen is
kang…” jare karto karo tangane njawil gelas kopi neng ngarepe. “ eh.. ari kanda
kang sudin tah ora kena nggo padan owh kang...” sarwan langsung njawab bae karo
rokoke kemebul.
Kang sudin kue salah siji
anake almarhum kyai Kasan yang di hormati neng desane nyong. Karismane kyai
Kasan kue laka padane sampe bangsane tergawe, wong dagang, pejabat, wong cilik
akeh sing pada namu njaluk barokah dongane. Seliane kya kue, almarhum kyai Kasan gemiyen jaman uripe istiqomah
mulangi ngaji maring wong desa, ora tua ora nom, lanang wadon.
Daripada anak liane, kang
sudin ora patia sukses neng bidang usaha. Anak-anake kyai Kasan akeh sing dadi
wong gede, mbuh kue gadi pemborong neng kota, sing ndue pesantren ya ana. Kur kang
sudin tok sing ora gelem mana-mana, nutugna perjuangane bapakane mulang
bocah-bocah neng desa. Rong wulan winginen kang sudin lagi terkenal karena
ujug-ujug ndue ilmu laduni sing ora kabeh wong bisa. Ndadake akeh wong sing
njaluk ditrawang nasibe.
“ Sing gawe nrawasi matane
lik, sekali ndeleng batuke wong kayane bisa ketebak kabeh kelakuane wong mau..”
toridin langsung nyrocos, emang ya sing mau wis pengin komen mbene kayong di
sela bae ngomonge. “Mugane kaya nyong dewek ya adang anuk isin dewek ari
jagongan bareng, mbokan kelakuane nyong di badek kabeh” nyong nyambungi
obrolane toridin.
“ Nitike lagi si katem,
prawan tua kae pan di lamar neng wong, sedurunge toran ketemu neng warunge yu darsih
oya, kang sudin langsung ngomong “ tem… koen batuke kinclong nemen, kayong
sedelat maning pan kawin” eh.. bener.. let pirang dina jebule ana wong sing nglamar..” karto melu nambai
“ Nyong ya ngalami, ceritane
nyong pan ngobor iwak oya, neng dalan ora sengaja ketemu kang sudin, malah
ngongkon kon nggawa wadah sing gede monine ngko iwake ora kamot, ndilalah iya olih
iwak akeh nemen, aku tah ndarani kang sudin ngomonge goyonan ?” sarwan melu ngakoni.
“Tapi saiki tah wis ora jeh…”
ujug-ujug ustad dopir teka. “Mbuh jare tanggane aku sing wingi mertamu, monine
kang sudin saiki wis ora bisa nrawang maning. Barang kang sudin tes ngilang
lawas owh… balik-balik wis kaya wong biasa maning. Ilmune jare ilang kabeh” ustad dopir njelasna. “ Lokeen kang ?? nyong penasaran karo ceritane
ustad dopir. “ Mugane ngko sekiki sore pada mana yuh, mumpung malem jum’at kan
kang sudin ora mulang owh, lawas ora ngopi-ngopi bareng..” ustad dopir ngejak
***
Sore kue nyong sms maring
ustad dopir, sida apa ora jare pan mertamu maring umae kang sudin. Barang batire
wis pada kumpul, latane ustad dopir nongol karo nggawa gula teh.
“Yuh…” jare ustad dopir karo
nganclang.
“Assalamu’alaikum…..” ustad
dopir uluk salam
“Wa ‘alaikum saaalam, mene..
mene.. pada manjing” kang sudin njawab karo mesem
“Tumben temen tembe pada
mene..?” kang sudin takon. “ Ya ora kang.. kayong ndelengna rika ahir-ahir kie
lagi akeh tamu gadine aku pan merek kayong isin mbokan nganggu..” ustad dopir
njawab nggo basa basi. Barang wis ngobrol mane mene, emang iya kayong
perilakune kang sudin wis rada sejen ora kaya sing wingi-wingi, biasane durung apa-apa
be wis di badeki kabeh. Bengi kue kang sudin ngobrole lepas, goyonan bareng.
Singkate cerita, ustad dopir
ahire takon kabare kang sudin ora gelem nrawang nasibe wong maning. Kang sudin
dewek maune ya ora gelem cerita, tapi barang saane wong sing neng kono pada
ngrayu ahire kang sudin gelem cerita.
“ Kye sedulur.. cerita
pertamane, pas malam apa kue aku ketekan tamu, wonge tah rada-rada pinter, ya
cerita mana mene bareng. Barang wong mau wis balik, aku tumben-tumbene ora bisa
turu nganti esuk. Pas ngliyep rasane bapane aku teka terus ngomong, “ Din..
koen kudu nemoni kyai sepuh sing anane neng
padepokan neng ngingsore gunung slamet, arane Mbah Sholeh. Mboh sholeh kue wali
agung, ora sembarangan wong bisa oleh kesempatan di wulang mbah sholeh” Ngimpi kaya
kue ora pisan ora pindo. Dadi aku penasaran, umpet-umetan ahire aku lunga.
Gelise cerita, aku ahire
anjog neng desa sing di todokna bapane aku, aku takon mana mene nganti sadina
laka wong sing weruh, aku nganti turu neng musholah. Pas bar jamaah sholat shubuh
ana wong sing nakoni, barang aku cerita wong kue latane nodokna, jare neng kene
wong sing cirri-cirine kya kue arane mbah kinareksa, nggone neng sebrange kali.
Ahire barang srengenge wis
duwur, aku marani maring nggone mbah kinareksa nglewati dlanggung sing esih
lemah abang, mlipir nglewati kali. Ternyata iya, barang tes nglewati kali ana
padepokan amba nganggone gubug pring, santrine ya jebule akeh. Ora di nyana
sing jare monine kyai sepuh, jebule wonge esih seger, awake gede duwur, raine
ya mencorong ngademi, meseme ya manis.
Gelise cerita, aku sowan. Barang
salaman tak deleng raine, mak jleg neng batuke ana tulisan “ahli Neraka”, sanjerone
atine aku “ idih loken…. Jare wali agung ganing batuke tulisane kaya kue”, dadi
akale cangkeme aku moni poyan pengin gadi santrine, tapi atine aku esih nolak
merga penasaran.
Saya dina saya dina tak
titeni tulisan sing ana neng batuke mbah sholeh tambah nyata. Apamaning ari tes
wudhu, kayane tulisan kue tambah mencorong. Tak titeni lelaku nggal dinane mbah
sholeh ya biasa kya kyai-kyai umume, sembayang fardu, sunah, mulang santri, ari
bengi ya wiridan karo tahajud. Ari ceramah neng pengajian tah kyane ora pernah,
paling diundang slametan neng tangga sekitar desa. Aku tambah penasaran, amalan
apa sing ngadekna ana tulisan “ahli Neraka” neng batuke mbah Sholeh.
Memang sih jare santri-santri
lawas sing ana neng kono, monine neng waktu-waktu tertentu mbah Sholeh kadang
lunga. Jarene kebiasaan kue wis dilakoni awit esih nom, monine tapa lelana
bratha.
Nah pas kebeneran, pas malam
jum’at kliwon aku ndue kesempetan, luwih benere tah aku nyolong waktu nggo
mbuntuti mbah Sholeh, penasaran pengin luruh jawabane masalah sing ngganjel
neng pikiran. Bengi kue wulane padang
mencorong, tumben-tumbene mbah Sholeh
kayane pan lunga tapi dandane rapi, klimis. Ndeleng wayahe wis bengi nemen
kayane ari pan slametan ya ora mungkin.
Ati-ati nemen aku mbuntuti
mbah Sholeh, endah aja konangan. Barang mbah Sholeh wis nglewati kuburan karo
wit wringin jebule belok, barang aku melu belok jebule wonge ilang mbuh maring
ndi. Lhah ka ujug-ujug jebule ana warung gubug neng pinggir sawah , damare nganggone
patromak, sing moci ya akeh nemen. Tak sawang-sawang pelayane wong wadon
ayu-ayu, pareme medok-medok nemen, perete ya mereh-mereh, karo jawal-jawil
maring wong-wong sing pada mesen inuman.
Astaghfirloh…. Sing bener
bae, loken iya mbah sholeh nglosmen neng tempat sing kaya kie ?. Aku nglegeg
oya, barang nglamune durung pragat jebule mbah sholeh ngundang aku.
“eh.. sampean jebule neng
kene din..? mene melu njagong owh…” Mbah sholeh karo ngomong karo narik tangane
aku. “ Kang, kue mene gawekna kopi siji maning, kie sedulur nome aku tembe teka
sing kana-kana..” jare Mbah Sholeh terus di jawab goneng pelayan sing menor kue
karo mesem.
“ Wis aja kakean mikir,
disruput kopine nggo tamba atis…” Jare mbah Sholeh. Jujur aku esih kaya wong
linglung, ora nyana, atine aku ndue krenteg sing ora apik maring mbah Sholeh. Atine
aku yakin mungkin gara-gara lelaku sing kaya kie mugane neng batuke mbah sholeh
ana tulisan “ Ahli Neraka”ne.
Sawise ngejak aku nginung
kopi, mbah sholeh nggabung maning karo kanca-kancane goyonan bareng, aku
ditinggalna dewekan. Ujug-ujug mbah sholeh marek ngajak aku balik jare wis pan
subuh.
“ yuh din.. sedelat maning
pan subuh, aja nganti konangan karo wong desa” jare mbah sholeh. Kaya kebo di
dadung cungure, aku nurut bae mbuntuti mbah sholeh balik. Dalan sing dilewati
ora kaya mau mangkate, jare mbah Sholeh endah cepet anjog. Emang iya, sadelat
tok jebule wis anjog neng pinggir kali. Sing gawe heran oya, mbah Sholeh
nyebrang kaline ora nglangi, tapi mlaku saduwure banyu.
“Laa khaula wala
quwwata illa billah…” aku kecrop weruh wong bisa kya kue
“ayuh owh din…” mbah Sholeh
ngawe-awe neng sebrange kali. Aku tah esih nglegeg setengah pan pingsan
ndelengna barang sing ajaib. Mbuh kegawa hawaneng apa aku ucul-ucul klambi
langsung njebur neng kali, padahal aku ora bisa nglangi, tapi ndilalah ora
klelep nyabrangi kali kue.
Barang aku lagi beres-beres
ngenggo klambi, mbah sholeh mandeg terus ngomong maring aku, suarane bisa sejen
gadi berwibawa nemen. “ Primen din… sampean wis nemu jawabane …?” Mbah sholeh
takon. Deg ..!!! “ganing mbah sholeh ngerti..?” sanjerone atiku ngomong.
“ apa saiki sampean wis nemu
jawaban apa sing ngadekna ana tulisan neng batuke aku ? apa sampean sing jare bisa
nrawang masa depane wong toli ora percaya karo trawange sampean dewek ? angin
kumbang sing semilir rasane nyrecep tekan balung sumsum. Ditambah dawue mbah
Sholeh tambah gawe ati mrekecet. Ilat rasane kaya di bundel ora bisa ngomong. Mbah
sholeh terus ngandani maning…
“ Cah bagus, sampean ora
perlu kawatir bisane neng batuke aku ana tulisan “ahli neraka”, sampean juga
ora perlu susah-susah nggoleti bukti aku nglakoni amalan apa sing ndadekna aku
dicap ahli neraka. Kerana sepisan, mungkin apa sing di werui sampean ora teka
saking pandangan atine sampean sing
bening, bisa krana nafsu, bisa juga krana ujub. ping pindone, sampean neng mesti wis ngerti
oya, pada baene surga lan neraka, awakku juga pada bae nduene Gusti Alloh, gadi
terserah gusti Alloh pan nglebokna aku neng surga mbuh neng neraka. Gusti Alloh
ora perlu alasan nggo nglebokna hambane neng surga atawa neng neraka. Kabeh mau
lantaran rahmate Gusti Alloh.”
“Ari bener jare sampean wong alim, apa sampean wani
njamin ari amal apike sampean bisa dadi dalane manjing suarga ? sewalike, apa
sampean wani njamin ari wong-wong mau sing ana neng warung mau pasti mlebu
neraka? Dewek kie agawe lelaku apik endah di pandeng apik marang gusti Alloh,
ndepe-ndepe endah parek karo sing kuasa, tapi apa dewek kiye wenang njaluk
piwalese? Krana apa? Krana dewek bisa agawe becik juga sebab rahmate gusti
Alloh…” Mbah Sholeh nuturi ora mandeg-mandeg.
Wis aku ora bisa apa-apa
maning, ndengak be kayane ora sanggup. Mbah Sholeh terus nepuk-nepuk pundake
aku. “ sing waspada ya bocah… ari diwei cobane sing kuasa sing bentuke anugrah,
sebab cobaan sing bentuke anugrah kue ora kalah bahayane karo cobaan sing
bentuke bala. Kaya wong sing neng warung mau kae, kae kye wong susah, wong
susah mesti jarang sing bisa takabur, apamaning sombong, beda karo wong-wong
sing ndue kelewihan, wong sing mambrah-mambrah mbuh kue dunyane mbuh kue
ilmune, godane luwih berat. Apamaning ari kelewiane mau wing di akui dening
wong akeh.”
“yuh wis balik, sedelat
maning adzan shubuh” mbah Sholeh terus ngadeg karo narik tangane aku. “ngko ari
wis sembayang shubuh sampean olih balik” jare mbah Sholeh. Asline tanpa kongkon
balik aku ya wis ndue niat pan balik maring umah, soale aku kadung isin ganing
edag-edege, ganing sifat ketluyane aku.
Barang aku ngadeg lha ka..
jebule mbah sholeh wis ilang gandra? Aku celingukan oya..? tak kejar ya ora
nyendak sampe tekan ana musholah aku mampir melu sembayang subuh. Barang wis
rampung, aku tembe sadar kie kan musholah sing pertama aku tembe teka mene ?
sing gawe herane maning, ujug-ujug ana wong njujugna buntelan klambine aku sing
tak tinggal neng pesantren gubuge mbah Sholeh. Jare monine ana wong sing
njujugna kon di wekna bocah sing winginen turu neng musholah kie.
Barang aku takon-takon
pesantren gubuge mbah Sholeh, wong kono laka sing paham, tak todokna sing anane
neng sebrange kali ya monine laka, anane kebon sengon. Ahire aku balik…
Begitulah ahire cerita, sampe
saiki pun sing arane mbah Sholeh alias mbah kinareksa kwe esih gadi misteri.
Nyong karo ustad dopir mung
bisa manggut-manggut tok, akale ceritane wis rampung tapi saanane wong sing
neng kono nglegeg, esih keder karo kejadian sing di alami kang sudin.
*di sadur dari cerpen karya KH. Ahmad Mustofa Bisri
Rembang dengan judul GUS JAKFAR.